I le valu lenei o tausaga o suiga o itula o le aso e auai fanau a Samoa i a’oa’oga lea sa suia i le 9 i le taeao ae tuua i le 2 i le aoauli, o lea ua toe foi i itula sa iai i le tele o tausaga ua mavae, o le 8 i le taeao ae tuua i le ‘afa o le tasi 1.30pm i le aoauli o aso ta’itasi.
Ua faia lea faai’uga e le Kapeneta i le māfua’aga e pei ona faailoa e le Palemia i le fono ma tusitala, ia tuumāmāina ai le pisi o taavale i le taeao a o le’i amata galuega i le 9, ma vave ai foi ona taunuu fanau i aiga, ma taofia ai nisi o faafitauli o loo fai ma tula’i mai o le vevesi o nisi o fanau a’oga i le taulaga.
I faamaumauga o loo faailoa ai o le tausaga e 2018 na suia ai taimi e amata ai a’oga mai le 9 i le taeao e oo i le 2 i le aoauli, ma na faia lea suiga ina ua suia le laina tuaoi o Samoa ina ua tatou faaaogā le suiga o taimi le daylight saving.
O lea suiga i le daylight saving na usu ai fanau i le a’oga a o amata i le 8 i le taeao o loo pogisa e le’i malamalama ma o le māfua’aga lea na amata ai i le 9 i le taeao.
O le toe foi i taimi sa amata ma tuua ai a’oga ua fetaui ma le taofia o le suiga o taimi le daylight saving lea ua savalia nei le lima tausaga e lē o toe faia, ma o se isi lea o faai’uga na faatino ina ua tula’i mai le faigāmalo muamua a le Faatuatua i le Atua Samoa ua Tasi.
