E tusa ma le tasi tesimale lima miliona ($1.5miliona) tālā Samoa se fesoasoani o le a toe fausia ai se taavale e faapitoa i le galuega o le fasiina o manu papalagi poo povi ina ia saga faatumau ai pea le tulaga lelei ma le saogalemu o aano o manufasi e faaaogā i taumafa.

O lea fesoasoani ua faamautū ai se konekarate i le va o le matāgaluega o faato’aga ma faigāfaiva ma se kamupani Ausetalia o le a latou fausia lea taavale e faatotoga i masini ma isi meafaigaluega mo le fasiina o manu papalagi.

Ua faatupe lea galuega e le polokalame o le Samoa Agriculture and Fisheries Productivity and Marketing poo le SAFPROM ae lagolago iai le Faletupe o le Lalolagi ma le IFAD poo le International Fund for Agricultural Development.

O le toe maua o sea taavale fasimanu e afua mai i le lelei faagaioia e le Matāgaluega o Faato’aga ma Faigāfaiva o le tasi o taavale faapea sa aumai muamua mo le faamoemoe lava o le saunia lelei o le fasiina o manu papalagi ina ia saogalemu tulaga uma mo le faaaogāina o aano o manufasi auā le tausiga o le soifua mālōlōina o tagata.

I le sainia ai o le konekarate e faamautū ai lea fesoasoani na faailoa ai e le Minisita o lea matāgaluega le afioga Niuava Eti Malolo, o le tāua tele o le tausisia o le saogalemu o le soifua mālōlōina o le mafua’aga lea o le faaaogāina o faiga faaonaponei e faatino ai le saunia o aano o manufasi e faasino i povi lea e faaaogā tonu iai le taavale o le a iai masini e faatino ai lea galuega.