O le tulai mai o lipoti e tusa ai o faalavelave tau taavale ia na lavevea ai ni pasi i Samoa i le tusa o le lua vaiaso talu ai, na fesiligia ai e le sui o le Radio Samoa, i se la faatalanoaga ma le afioga i le Minisita o Galuega, Fela’ua’iga ma Galuega Tetele a le atunuu, le Tofa Olo Fiti Vaai, le tele o ni vaega e ono sootaga atu i nei faalavelave, e pei o le tulaga o toe iai le malolosi o nei fausaga laupapa o pasi i Samoa, aemaise foi pe na atoatoa le tulaga o le laiseneina pe na pasia foi nei pasi i le taimi na tutupu ai faalavelave.
Mo le pasi na lavea i Fagaloa, sa saunoa le alii minisita ina ua fesiligia, e tusa ai ma lipoti na tuuina ane e lana vaega o le LTA, o lea sa pasia uma lava pasi nei e aofia ai le pasi na lavea i Fagaloa.
Peitai la o lea ua toe aumai se faasa’oga mai le afioga i le Minisita i se tasi o ana faamatalaga e faatatau i le pasi na aafia i le faalavelave i Fagaloa, i le finagalo o le alii Minisita e tāua lava ona sa’o a’ia’i pea faamatalaga e tuuina atu i le mamalu o le atunuu.
Ta’ua i le faamatalaga na toe tuuina mai, ‘mo le pasi la’upasese MO 534 lea na aafia i le faalavelave tau taavale i Fagaloa, ua maua i faamaumauga e lei pasia lenei pasi la’upasese i le pasiga o Tesema 2022, e lei oo atu lenei pasi i le lotoā a le LTA mo le faatinoga o le galuega ma le matafaioi a le pulega.
O le faafouga o resitala mo nei pasi la’upasese ua faatulaga e ta’i fā (4) masina ma faatautaia; ae o lea la e tusa ai ma faamaumauga mai le pulega e gafa ma lenei galuega, e lei toe oo atu le pasi lea e toe faafou lona resitala ma faamautu ai le tulaga saogalemu o loo iai.
Ua faamalulu mai ai le afioga i le Minisita ma le pulega e tusa ai o se sasi i le faamatalaga na ia muai tuuina mai, ae o lea ua finagalo ina ia toe faamanino pea ma faasa’o se faamatalaga na ia faia i le taimi o lana faatalanoaga.
