A o loma nisi o taaloga lakapi faavaomalo i le masina nei, o le masina fou ma le taamilosaga faavaomalo o le a feiloai ai i laueleele o le atunuu le tatou aulakapi tele o le Manu Samoa, ma ‘au a Fiti ma Tonga i le masina o Iulai, a o lumanai le Ipu o le lalolagi i le masina o Aokuso, ua iai se finagalo o le Malo e toe faaleleia le malaetaalo o le Apia Park, ina ia tapena lelei ai mo ia taaloga faavaomalo.
Ua faailoa e le taitai o le Malo lea fuafuaga e pei ona iai se faaiuga a le Kapeneta ma ua taoto atu ai i le matagaluega o Aoga Taaloga ma Aganuu faapea le faalapotopotoga o taaloga eseese i lo tatou atunuu mo le faia o ia tapenaga uma.
O se tasi o tapenaga tāua ua faalauiloa e le pulega o le Lakapi Samoa, o se sailiga tupe e faaaoga ai auala o fesootaiga i televise ma leitio i lo tatou atunuu, auā le tapena atu ai o le tatou Manu Samoa i le Ipu o le lalolagi e faia i Farani.
O le aso 28 o le masina nei o Aperila e faia ai lea sailiga tupe.
