E oo atu i le to’avalu (8) tagata ua lipotia mai le aafia, pe na lavevea i faaitu e lata ane i Ōpōtiki, i se faalavelave tau taavale.
O le mata’utia tele o lenei faalavelave na ta’ua le moomia o fesoasoani tau lavea’i mai helikopa e tali atu i lenei matāupu.
I ripoti, na faaalia ai na valaau ane leoleo i se lavea i luga o le State Highway 2 poo le ‘afa o le 8 i le afiafi o le Aso Lua o lenei vaiaso i Waiotahe, o ni taavale se lua ua feto’ai.
E 4 ni taavale falema’i (ambulances), o sui o vaega o ma’i tigaina poo le (critical care unit), o vaalele o fesoasoani tau lavea’i (rescue helicopters) ma le to’atele o sui o faalavelave tutupu faafuase’i na iai i lea faaitu.
Faaalia e to’atasi se tagata na iai i se tulaga tigaina tele lea na avatu faanatinati e ala i se helikopa i le maota gasegase i Waikato.
Faamauina e se tasi o sooupu, na tapunia lea itu auala mo su’esu’ega a le auaunaga a leoleo, ma na faato’ā tatala le auala i le vaveao o le Aso Lulu, poo le ‘afa o le tolu aga’i atu i le itula e 4.
O loo faasolo sa’ili’iliga ma su’esu’ega a leoleo e tusa ai ma māfua’aga o le tula’i mai ai o lenei faalavelave.
Puna o Faamatalaga: https://www.nzherald.co.nz/nz/opotiki-crash-eight-injured-in-waiotahe-beach-rd-incident/R6ECUKTUL5HXBB5EDYPUDADTGE/
