O le aso ananafi na māua ai i lipoti mai Ausetalia le aafia ai o nisi o alii Samoa i se faalavelave tau taavale i Vitoria.
I lipoti ma faamatalaga o ni alii sa faigaluega i galuega tau faatoaga e ala atu i galuega faavaitaimi lea na aafia i lea faalavelave.
Ma i lipoti o le asō ua faamauina ai e toalua alii ua maliliu ae manunu’a tigaina isi e toaiva, ina ua feto’ai le minibus na malaga atu ai ma se laau.
O lenei faalavelave mata’utia na lipotia mai e faapea, o le minibus lea sa oatu ai nei tagata faigaluega i faatoaga, ma o le taumafai ai o le avetaavale e tipi pe pasi se isi taavale a o malaga atu i le Calder Highway i Carwarp, i le 30km i le itu i Saute o Mildura i le itu i Matu i Sisifo o Vitoria i le tusa o le 7.45am i le taeao o le Aso Lua; foliga mai ua faigata i le avetaavale ona taofiofi le alu a le taavale ma tifa atu ai ma so’a se laau i autafa o le auala.
I se lipoti mai leoleo o loo ta’ua ai, o i latou uma o le pasese a le minibus lea na lavea, e faigaluega uma i ni nofoaga e lē mamao tele mai le nofoaga na tupu ai le faalavelave, ma o loo ta’ua o i latou uma nei ua maliliu ma manunu’a o ni tagata faigaluega e malaga mai isi atunuu.
O i laua ua maliliu na i’u ai lava o la soifua i le mea na tupu ai le faalavelave, ae na avatu faatopetope le alii avetaavale i le falema’i i ni manu’aga ogaoga, ae o le isi tagata o le pasese o loo tigaina ona manu’aga na faavave atu i se helikopa i se falema’i e lata ane i Vitoria.
O le isi toatolu o loo manunu’a tigaina na faavave atu i le Mildura Base Hospital, ma le isi toafā na ave uma foi i le falema’i ina ia faia pea ni siaki.
O loo māua i luga o upega tafailagi se faigalotu na faia e nisi o tagata faigaluega a Samoa i Ausetalia lava na faia faapitoa e manatua ai i la’ua ua maliliu aemaise e manatua ai i latou o loo faamanu’alia i lenei faalavelave mata’utia.
