Ua ave le faamalo ma le faafetai a le pulega o se tasi o kamupani vaa tele i le lalolagi le MSC poo le Mediterranean Shipping Company o loo galulue ai nisi o alo ma fanau a Samoa, ona o le galuega lavea’i i le sami sa faatino e le to’a sefulufā o alii vaa poo seila mai lo tatou atunuu, o loo galulue i le vaa la’uoloa tele o le MSC Splendida.
I se faamatalaga faalauiloa i le upega tafa’ilagi a le kamupani vaa a lo tatou malo le Samoa Shipping Services o loo faailoa ai lea galuega lavea’i i le gataifale o le motu o Balearic, o se tasi o motu o le atunuu o Sepania.
E to’a sefuluiva tagata na faasaoina mai i lea galuega lavea’i a alo ma fanau a Samoa o loo galulue o ni seila i se vaa a lea kamupani vaa i le lalolagi.
O se taumafataga o le afiafi na avanoa ai se ofisa sinia o le pulega o le kamupani vaa o le MSC e momoli le faamalo ma le faafetai i alii vaa mai Samoa sa faatinoina lea galuega lavea’i.
O i latou ia e aofia ai Willie Roy, Sanele Tuilagi, Apineru Urima, Eikomene Tagaloa, Eferona Matafeo, John Mark Tauiliili, Pale Tofaeono, Toe Junior Togatuki, Faamotu Puleitu, Faafili Tauailoto, Patelesio Ioane Tafunai, Avau Pulepule, Sosiua Junior Folasa, ma Matureo Lualua Tautu.
O le to’a sefuluiva o tagata e aofia ai ni fanauiti se to’alua na lavea’iina mai se faaletonu na aafia ai se vaa sa malaga ai sa auina atu i le vaa oloa o loo galulue ai alo ma fanau a Samoa, ma latou malaga atu ai i le atunuu o Paselona.
Ua faaalia ai le agaga faagaeetia o le pulega o le kamupani vaa a Samoa ona o lea galuega lavea’i ua faailoa atu ai agavaa ma tomai ua umia e o tatou tagata o loo galulue i luga o vaa tetele o le sami a lea kamupani vaa.
