Ua faamaonia mai e le Komiti o Faalavelave Faafuasei le NEOC e to’a 10 ni tagata sa malaga mai Brisbane Ausetalia mo Samoa lea ua maua i le vairusi o le Koviti19.
O le Aso Lulu 19 o Ianuari o letausaga nei na tulaueleele ai lenei faigamalaga i le malae vaalele i Faleolo ma e silia ma le to’a 70 le pasese atoa.
O lenei to’a 10 e to’a 4 alii ae to’a 6 tamaitai, ma e aofia ai ma tamaiti laiti. O le aupito i laititi o i latou ua aafia o le pepe 11 masina le matua.
O loo iai nei i nofoaga faanofoesea faapitoa i le falemai ma e le’o vaaia ni foliga tigaiga mai le faama’i. O le a mataituina lelei e le Matagaluega i latou nei ma faagasolo pea ona fai o latou tui ma siaki.
E pei ona silafia o i latou nei e to’a 10 sa atoa uma a latou pepa na faaoo atu i aiaiga o le mafai ona malaga peitai o le toe siaki atu i le taunuu atu i Samoa ma maua ai i latou nei ua aafia i auga o le faama’i.
O loo maualuga le manatu a le Matagaluega e leai se tasi o le atunuu ua aafia poo ni community cases ua na’o i latou o loo malaga atu ma o loo faanofoesea nei.
