O le masina o Oketopa ua atofa e le lalolagi atoa e faamanatu ai le Puipuiga ma Togafitiga ae le gata i lea o le tetee atu i le faama’i oti o le Kanesa aemaise le Kanesa o le susu.
Mo Samoa lava ia o se masina e faataua tele i le atunuu e manatua ai i latou na aafia ma fano ai o latou ola i le faama’i matautia o le Kanesa aemaise lava o le Kanesa o le susu (breast cancer). O tausaga uma la i le masina o Oketopa e laei ai le lanu piniki e le gata i totonu o fale faigaluega ae faapea foi i totonu o nisi o aoga.
Taua e le taitai o le Malo Fiame Naomi Mataafa i lana feiloaiga ma tusitala i le vaiaso nei le laeiina e lana Kapeneta o le lanu piniki e lagolago ai i taumafaiga uma e togafiti ma tetee atu ai i le gasegase o le Kanesa ua toatele tagata o le atunuu ua maliliu ai.
Na amata faamamalu le masina faalauiloa poo le Awareness month i aafiaga o le Kanesa o le susu i le tausaga e 1985, ma 1990 na filifilia ai
loa lanu piniki e fai ma lanu o le masina o Oketopa ma maua ai le igoa ua faaigoaina ai i taimi nei le Pinktober.
O le taiala o le tausaga nei ua faaulutalaina i le gagana faaperetania “Working Together” poo le Galulue Faatasi. O galuega faatino a le Sosaiete Kanesa Samoa faatasi ai ma le lagolago malosi a le ANZ o le tuu atu lea o le feau taua i tagata lautele i le ogaoga o le Kanesa o le susu ma ona aafiaga i le tino o le tagata pe a le mafai ona Puipuia ma togafitia.
