Ua iai nei le faai’uga a le Kapeneta e pei ona faailoa e le Palemia i lenei vaiaso i le fono ma tusitala, o le a tuuina atu le lipoti i su’esu’ega faasu’etusi sa faia i nisi o galuega tetele o le atina’e o le atunuu, i le Loia Sili a le malo ma leoleo mo se su’esu’ega atili.
E pei ona silafia o lea su’esu’ega faasu’etusi sa faatino i le taimi na ulufale ai le faigāmalo muamua a le Faatuatua i le Atua Samoa ua tasi i le ta’ita’iga a le afioga Fiame Naomi Mataafa sa seei i le tofi Palemia.
I le taunuu atu o le faigāmalo ua iai nei a le faatuatua i le Atua Samoa ua tasi i le ta’ita’iga a le afioga i le Palemia Laaulialemalietoa Leuatea Polataivao Fosi, e le’i faia se faai’uga i le lipoti o lea su’esu’ega.
Ua faailoa ai e le Palemia e tele gaioiga faasolitulafono o loo faailoa i le lipoti ma o le māfua’aga lea o le faai’uga a le Kapeneta e tuu atu loa i leoleo ma le Loia Sili mo su’esu’ega.
