O loo teena e le malaevaalele i Aukilani faamatalaga e faapea e lē o iai i se tulaga lelei ma alualu i luma galuega e faia i le umi ona faatalitali o pasese mo siaki masani mo faigamalaga.
O lea ua sosoo faaiuga o vaiaso o taligā pasese e siaki tusifolau i le malaevaalele.
Ona o lea faafitauli na tuuina mai ai se faamatalaga faalauaitele a lē sa avea ma Palemia o Niu Sila, Helen Clark ua tatau ona iai se suiga i le faiga o loo faatautaia ai siaki i le malaevaalele.
Na faaalia foi atugaluga a le toatele i le lē fiafia i le fiu e tutū, ma ua oo lava i pasese e leai ni ato, o lea lava foi na aafia ai.
Faailoa e Clark, ua tatau ona fai se fuafuaga, ua na o le ta’uvalea ai o Niu Sila.
Ae na tali le sui o le pulega a le malaevaalele i tala a le 1News, ua taunuu faatasi mai faigamalaga i le taimi e tasi i le aoauli faapea ai ma le faaletonu o le tau, o le mafuaaga lea ae peitai ua tele ina faaleleia le auaunaga e ui ua alu i luga i le 20% tagata e omai ma toe foi.
Faailoa foi e le pulega o malaevaalele o le toatele lava o pasese na taunuu mai o lea e na o le 20 minute le umi e faasolo ai i siaki masani, ae o pasese e tuua le atunuu, e lē atoa se 10 minute.
