Ua manino nei i se ata lata mai o le palota laitiiti a Vaimauga 3 e to’atolu sui tauva mautinoa e aofia ai ma lē sa tauaveina le nofoa o le itumalo palota i le paeaiga 17 a le Palemene sa avea ma minisita o tupe, le afioga Lautimuia Afoa Uelese Vaai.
Ua faamaonia mai e lea tamalii lona sauni i le faigā filifiliga a Vaimauga 3 lea ua faailoa aloa’ia nei e le ofisa o le komisi o faigāpalota o le aso 29 o Aperila le palota muamua ae o le Aso Faraile le aso muamua o le masina fou o Me e faagasolo ai le palota laitiiti.
O le afioga Lautimuia Afoa Uelese Vaai na manumalo i le palota laitiiti a lona itumalo i le masina o Fepuari o le tausaga e 2023 ma avea ai ma sui lagolago o le pati faaupufai o le Faatuatua i le Atua Samoa ua Tasi.
Na māfua lea palota laitiiti ina ua tuumalo le sui faipule o le itumalo na filifilia i le palota tele o le tausaga e 2021 le afioga Tapunuu Niko Lee Hang.
O le toe fetuuna’iga o minisita o le kapeneta poo se cabinet reshuffle i le paeaiga 17 a le Palemene i le taimi o le ulua’i pulegamalo a le Faatuatua i le Atua Samoa ua Tasi i le ta’ita’iga a le afioga Fiame Naomi Mataafa, na filifilia ai Lautimuia i le Kapeneta.
Na suia lona tauva i le palota tele ia Aokuso 2025 i le vaega faaupufai o le Samoa ua Potopoto ae e le’i toe filifilia ai.
O le avanoa o le nofoa o lona itumalo ina ua faamavae le sui faipule sa manumalo i le palota tele i le tausaga ua mavae, ua a’e sona lagona e toe tauva i le palota laitiiti o loo loma nei ae o le a lē lagolago i se pati faaupufai ae o le a tauva faatuto’atasi.
O isi sui tauva e to’alua ua faailoa lautele mo le faigā filifiliga a Vaimauga 3 o le afioga Taioaliiseu Fiti Aimaasu o le a tauva i le fu’a a le Faatuatua i le Atua Samoa ua Tasi ma le tofa Tuuamaalii Tupuola Foma’i Faaniniva Sapolu o le sui tauva o le vaega e puipuia aiā tatau a tagata.
O le Aso Faraile nei le aso 10 o Aperila e tatala ai le avanoa e faaulu ai suafa o sui tauva mo le palota laitiiti ae o le Aso Tofi 16 o Aperila e tapunia ai le avanoa e toe faaui ai i tusa se suafa o se sui tauva mo le palota laitiiti a Vaimauga 3.
