O le mulimulitaia o aiaiga faaletulafono mo se oloa a o lei faatauina atu i le atunuu ina ia fetaui lona mamafa ma le tau ua faatulaga, o se tasi lea o tāua i nisi o meafaigaluega e pei o fua o le mamafa ua tauaao nei e le Ofisa Sili ma le pulega o le Matagaluega o Alamanuia, Pisinisi ma Leipa.
O ni meafaigaluega o le a faaaogā i oloa mo fefaataua’iga sa faameaalofa mai e le ofisa o le fono mo atunuu o le Pasefika poo le Pacific Island Forum Secretariat.
O lea matagaluega a le Malo o loo faamalosia le tulafono o fua o mamafa ma fua eseese o oloa o le tausaga e 2015, lea na amata faamamaluina i le tausaga e 2016.
O meafaigaluega ua umia nei e le Matagaluega o Alamanuia, Pisinisi ma Leipa o le a faaaogā foi i nisi o auaunaga tau pisinisi e pei o pamu penisini, ma faleoloa o loo faatau ai oloa eseese o loo faatau atu e fua i le mamafa poo pauna lea ua faaaogā ai le kilo e fua iai le mamafa o se oloa e manaomia e le tagata faatau.
