Ua avanoa se tasi o tofiga ofisa sili lagolago o le matāgaluega a le Palemia ma le Kapeneta ina ua talia le faamavaega a lē sa seei i se tasi o ia tofiga sa avea ma faauluuluga o le ofisa sooupu o le malo le afioga Nanai Laveitiga Tuiletufuga, lea sa faamālōlō lē tumau i le fā vaiaso ua mavae ona o le matāupu na sesē ai le faai’uga a le Kapeneta na faasalalau i le tofiga o le Ofisa Sili o le matāgaluega o le soifua mālōlōina.
O le fono muamua a le Kapeneta i lenei tausaga fou na faailoa e le Palemia na oo atu ai le faamavaega a Nanai ae na taunuu faatasi atu ai ma le lipoti a le komisi e pulea tagata faigaluega a le malo sa su’esu’eina le sesē o le faasalalauga mai le sooupu.
Faaalia e le ta’ita’i o le malo o le taunuu faatasi le lipoti ma le faamavaega, ua talia ai e le Kapeneta le faamavaega a lea tamalii sa ulua’i tofia e avea ma sooupu i le masina o Iuni o le tausaga e 2017, i le tuana’i o tausaga e tele sa galue ai o se tusitala mo nusipepa, o leitio, ma televise i Samoa ma Amerika Samoa.
