Na tula’i mai se faafitauli i le falema’i i Hutt Hospital, i se gasegase tama’ita’i sa faataotolia ai, na tipi lona vae (leg amputation).
A o faataotolia ai lea tama’ita’i na lipotia ai le taumafai soo o se isi gasegase alii e tau faaletonu lona mafaufau, e faatino ni ana faiga lē talafeagai e pei o le taumafai e tago tago atu i lea tama’ita’i a o moe, ma taumafai foi e autilotilo atu iai a o faata’ele lea gasegase tama’ita’i.
Ta’ua foi i le lipoti le faia o ni ana faamatalaga lē talafeagai i le tama’ita’i e faagaee ai faalogona faaleituaiga ma toe laga meatotino a lea gasegase.
O le tausaga e 2022 na tula’i mai ai lenei faafitauli, ma ua ta’ua i le lipoti mai le Health and Disability Commission, sa le’i taulau le falema’i i le faatinoga o o latou tiute ina ia malupuipuia sogalemu lea gasegase a o faataotolia ai.
E ogaoga aafiaga na oo iai lea gasegase, ma i’u ai lava ina talosaga lona aiga e vave faate’a i tua e tausi ai i lona aiga, ma ua fefe foi e toe foi i le falema’i.
E ui na faia e le falema’i nisi gaioiga e tau taofiofia ai gaioiga a lenei alii, e pei o le tofia o se tasi e vaavaaia lenei alii, faainu ana fualaau, ma faamaulu foi se taulima e faailo ai ni ana gaioiga e fai, ae sa faaauau pea ona faateteleina uiga lē popoi o lenei alii se’ia oo ai lava ina tāpā se fesoasoani a le foma’i o le mafaufau.
Na faailoa e le Health NZ i le komisi sa faia le su’esu’ega o lenei mataupu, e le’i mafai e le falema’i ona aveese atu lenei alii i se isi nofoaga e taumafai e pulea ai ona uiga, ona o le lē lava o alagā’oa e faaaogā mo galuega, ae sa taumafai e tuu lenei gasegase i se isi potu na o ia, peitai e na te le’i talia, ona e manatu e sili atu ona saogalemu pe a iai faatasi ma isi gasegase tama’ita’i nai lo le tuu na o ia.
Ona o le faafitauli na tula’i mai i le falema’i ua aafia ai lenei tama’itai i mafatiaga o le mafaufau poo le post traumatic stress.
O lenei su’esu’ega ua taumafai ai le falema’i ina ia toe faaleleia atili lana auaunaga, faia ni a’oa’oga a le aufaigaluega, e aofia ai ma leoleo o le puipuiga, o le ‘autoso ma’i ma isi uma tagata faigaluega, ina ia latou amana’ia lamatiaga o amioga lē taupulea nei faaleituaiga.
Ua tilotilo foi le falema’i i le tau faatulaga o wards e tuu faavaega ai lava gasegase alii e ese mai le itu o gasegase tama’ita’i mo le tausisia o le tulaga mamalu o gasegase, aemaise foi le faatulaga o vaega e iai gasegase masani, ae faatulaga ese le vaega e iai i latou e lē sagatonu lelei mafaufau ma iai uiga pa’a’a.
Puna o Faamatalaga: https://www.rnz.co.nz/news/national/585705/patient-touched-while-sleeping-watched-while-washing-during-recovery-at-hutt-hospital?cid=newsletter
