O le toe faagasolo ai o faafiafiaga a Tupa’i Bruno ma le Magic Circus a Samoa i le nofoaga i Vaitele tai e pei ona savalia nei le 2 vaiaso, ua faailoa e Tupa’i Bruno le iai nei o ni matai mai le nuu o Toamua ua ofo atu e latou te vaaia le saogalemu o le nofoaga i taimi o le po e faia ai ana faaaliga, e mafua i nisi o tupulaga mai lea afioaga na latou taua’ia le faleie tele i maa ma atigifagu i se tasi o po na faia ai le faafiafiaga i le vaiaso na te’a nei.
Faaalia e le alii pule o le Magic Circus a Samoa e leai nisi na aafia i maa ma atigifagu, ae na o le tioata pito i tua o se tasi o taavale a lana kamupani na nuti lilii ma faaleagaina.
E lē o iloa le mafuaaga o lea gaioiga ae e toafā ni taulelea na pu’eina e nisi o le aufaigaluega a le Magic Circus ma latou taofi a o faatali le taunuu atu o leoleo.
O le toafā lea sa taofia e leoleo mo suesuega ma ua faia iai moliaga solitulafono.
E lua masina ua toe faagasolo ai faafiafiaga a le Magic Circus a Samoa i lo tatou atunuu ina ua taliu mai se latou malaga taamilo sa faafiafia ai i nisi o atunuu o le Pasefika.
O se tasi lea o faafiafiaga faapisinisi o loo tauaveina le igoa o Samoa pe a malaga taamilo e faafiafia ma faia a latou faaaliga, ma e toatele foi alo ma fanau a le atunuu ua maua ai ma galuega aemaise i latou ua a’oa’oina lelei i le faatinoga o faafiafiaga eseese.
