Ua lipotia mai nei e le leitio faavaomalo a Niu Sila, le finauina ai e sui o le asosi o taavale afi i le vaega o loli la’uutamamafa – trucking industry, le malo i le tatau ona toe iloilo tulafono ma faasalaga i loli la’uuta mamafa e maitauina le faaaogā pea i luga o ala tetele e ui ina iai i ni tulaga ua lē o toe saogalemu.
Ua tutū malosi le asosi ina ia faataunuuina ia fuafuaga talu ai le matāupu e pei ona alia’e mai ai le maliu faafuase’i o se tagata talu ai le faatamala o se tasi o tagata faipisinisi ma lona lē usita’ia o ala e tusa ai ma tulafono o taavale ma loli e lē tatau ona toe vaaia o feoa’i ma faaaogā i luga o le auala.
Mo le silafia o lenei matāupu ua falepuipui ai le alii faipisinisi o Ashik Ali i le moliaga o le fasioti tagata pa’ivalea.
E pei ona faailoa, o lea tagata ma lana loli la’uuta mamafa na māfua ai le maliu o se tasi o tagata faigaluega sa faatinosana galuega.
O le mea mata’utia, o le tele o taimi na faatonuina Ashik Ali i le tatau ai ona aveese lea loli ona ua mae’a ona faia iai siaki a le NZTA ma ua lē aogā ona toe faaaogāina, ae pagā e le’i usita’ia e Ali fautuaga ma faatonuga peita’i na o lona pelogia o le pulega o le a ia usita’ia ia fautuaga.
Faaalia e le faauluuluga o le National Road Carriers Association, e fai lava sina vaivai o aiaiga ma ta’iala o loo iai i le taimi nei, ma e lē o mafai e le NZTA ona taofia taavale ma loli o loo latou tilotilo ua lē talafeagai ona toe feoa’i i luga o auala.
I lona iloa o le vaivai tele o tulafono o loo aiaia ai galuega faatino a lenei auaunaga, o lea lava na maua ai le avanoa o Ashik Ali e fai ai lava lona loto, ma i’u ai lava ina ma’umau ai le ola o se isi tagata.
Puna o Faamatalaga: https://www.rnz.co.nz/news/national/579737/truckies-call-for-tougher-rules-on-unsafe-vehicles
