O le tasi lenei o vaega o le auaunaga a le Soifua Maloloina e telē lona tāua i le atunuu e ala i suesueina o gasegase ma e tele ina lafo i atunuu mamao ni suesuega pe a lē mafai ona faatinoina i Motootua ae peitai o le asō lea ua tatalaina aloaia ai se tasi o fale suesue e fesoasoani lea i le auaunaga a le Matagaluega o loo ua iai nei.
O lenei falesuesue o le a mafai ona suesueina ai gasegase e pei o le kanesa o le susu o loo aafia ai tamaitai, cervical cancer, kanesa o le atealii poo le prostate cancer ma nisi o gasegase ma o le a faafaigofie foi ona vave ona maua faaiuga o nei suesuega i masini faaonaponei ua mae’a faapipiiina.
O lenei poloketi na saunoa ai le Sui mai le Ofisa o le Soifua Maloloina Atoa Dr. Glenn Fatupaito e tusa ai o lenei auaunaga o le a mafai ona fesoasoani ai i gasegase e suesueina i le atunuu.
“O nei taumafaiga uma ina ia mautinoa le atoatoa ona lelei le auaunaga aemaise ai le soifua maloloina o o tatou tagata lautele ma o loo gatasi lava ma fuafuaga a le Soifua Maloloina i ana auaunaga.
“O le tatalaina o lenei falesuesue o se taeao fou lea i auaunaga faalesoifua maloloina e ala i masini faaonapo nei o le a mafai ona tautuaina ai le mamalu o le atunuu i suesuega o gasegase e pei o le kanesa.”
O lenei poloketi o loo mafai ona faatupeina e le Malo o Ausetalia e ala i fesoasoani i atinae ma le faigapaaga ma le Ofisa o le Soifuaga Fanau – tama Manuia poo le Samoa Family Health Association (S.F.H.A.).
O alii mai Fiti o loo nafa ma lenei falesuesue e ala i le faapipiiina o nei masini faatasi ai ma le vaaia lelei na saunoa ai Josese Mailulu o se technician Sinia o le manaoga ina ia mafai ona oo atu lenei auaunaga e olua ma auaunaga a le S.F.H.A. i tua i nuu ma afioaga.
“E iai le manatu o le a mafai ona oo atu lenei auaunaga i nuu ma afioaga e faafaigofie ona faatino test ma vave ona faatino ai suesuega e pei ona iai masini ua iai nei i lenei fale suesue e faigofie ai ona iloa ma vave ona togafitia nisi e aafia.”
O nei masini o le a mafai ona vave maua ai faaiuga o suesuega o le a faatinoina i se taimi puupuu e fua i le ituaiga gasegase o loo suesueina.
O lenei falesuesue o loo iai lea i le nofoaga o loo iai le Ofisa a le S.F.H.A. i Motootua o loo faafesagai ma le maota gasegase.
