E lua tapenaga a le Malo o loo faatino mo le fono a Malo o le Taupulega i le masina o Oketopa, o tapenaga i le auai o le faauluuluga o Malo o le Taupulega lana Maiesetete le Tupu o Salesa III ae o le uluai malaga faatupu poo le state visit a le Tupu i Samoa.
Ua faailoa e le ta’ita’i o le malo le afioga i le tamaitai Palemia lea tapenaga ina ua ia folasia i le maota fono o le Palemene i le Aso Tofi ua mavae, le tulaga ua iai tapenaga mo lea fonotaga tele faavaomalo.
Na saunoa le Palemia le afioga Fiame Dr Naomi Mataafa ma ia faailoa o le fono autu a ta’ita’i o Malo o le taupulega o le a usuia i le maota fono i Tiafau, ae ua tapena foi isi nofoaga mo isi fonotaga o le a faagasolo ai i lea taimi, e pei o le fono faapisinisi, o le fono i mataupu tau tamaitai, ma le fono a tupulaga ma tamaitai o malo o le taupulega.
O le saunoaga foi a le tamaitai Palemia sa taualuga iai tali a le Malo i le tala faatatau autu o le tupe, na ia afea ai le tulaga i le siitaga o totogi, ma atugaluga o nisi o sui faipule i le maoa’e o le 31 pasene ua toe fetuunai ai totogi o Faamasino Samoa o loo galulue i le Faamasinoga o Fanua ma Suafa.
Na faaalia e le ta’ita’i o le Malo, o le faatulagaga o tulaga tofi taualoa o le Malo lea e aofia ai sui faipule o le Palemene ua manatu nisi o sui faipule e lē o aofia ai faamasino Samoa ma o loo tāaofai i le lautele o tagata faigaluega a le Malo, peitai na faailoa e le Palemia i le fono usu a le atunuu e lē sa’o lea manatu.
Le ta’ita’i o le Malo le afioga i le tamaitai Palemia i se vaega o lana saunoaga na taualuga iai tali a le Malo i mataupu sa laga i le tala faatatau o le tupe mo le tausaga faaletupe 2024 i le 2025 lea ua pasia e le fono aoao faitulafono.
