O le tāua o le lava tapena ma sauniuni o auaunaga i Samoa o loo galulue e ofoina fesoasoani ma tali atu i taimi o puapuaga ma mafatiaga pe a tula’i mai ni galulolo poo tsunami, ua faagasolo ai i le vaiaso atoa lenei se fonotaga o loo auai itutino faavaomalo e feagai ma tapenaga i taimi o galulolo.
O loo auai foi ma ofisa sinia o le ofisa o le tatou malo o loo iai le pulea o galuega e tali atu ai i taimi o faalavelave faalenatura.
I se pepa faalauiloa o lea faatasiga o loo faailoa ai e 12 vaega autū o tapenaga o loo taula’i iai fetufaaa’iga i lea fono, i le naunauta’iga o ē o loo faauluulu i tautua ma auaunaga e ofoina i taimi e tutupu ai ni galulolo, ia lava tāoso polokalame e tali atu ai.
I le tausaga e 2017 o le afio’aga o Savaia i Lefaga sa faamauina ia latou tapenaga e tusa o faata’ita’iga sa faatino, le lelei faataoto o polokalame e tapenapena iai tagata o le nuu.
O le ofisa o le malo o Amerika o loo faaauala mai ai le fesoasoani tupe ua mafai ai ona usuia i Samoa lea fonotaga.
