O tapenaga uma sa faailoa e le Komesina o faigāpalota mo le palota laitiiti a le itumalo o Safata 1, ua taofia nei mo se taimi lē tumau se’ia iai se aso.
O le Aso Tofi na aumai ai se faasilasilaga faalaua’itele mai le ofisa o le Komesina o faigāpalota ua faailoa ai le tolopo o le palota laitiiti sa faatulaga o le Aso Faraile o le vaiaso nei, le aso 16 o Ianuari e faaulu atu ai suafa o sui faatutū.
Ua faailoa e le Komesina o faigāpalota le afioga Toleafoa Tuiafelolo Alexander John Stanley i le faasilasilaga mai lona ofisa, o se faai’uga a le Kapeneta na faia e tusa o le Vaega 38 o le faavae ua mafua ai ona tolopo le faigā filifiliga a lea itumalo faapalota.
O le Vaega 38 o le faavae o loo faasino i le taimi e faatino ai faai’uga a le kapeneta.
Ua taloina mai e le Komesina o faigāpalota se feiloa’iga ma tusitala e faamalamalama ma faamanino ai le māfua’aga o le tolopo o le palota laitiiti a Safata 1 lea sa fuafua o le Aso Faraile le aso 6 o le masina fou o Fepuari e faia ai.
