O le Aso Faraile o le vaiaso na tea nei, na fofoga ai le talosaga autu a Afega, mo se poloaiga a le faamasinoga e faamalosia ai le faatulai ese o aiga o loo nofoia fanua e pulea e Afega i lalo o le faamalumaluga a Fata ma Maulolo.

E lata i le 100 le aofai o aiga ua tatau ona tapena ese, e pei ona faamanino i le faamasinoga.

O mafuaaga na ta’ua e le alii faipule ia Maulolo Tavita Amosa, ua faalavelave i le faatinoga o galuega, e lē gata i lea o le lafo o faaupuga masoā, o le tase’i ese o pine a fua fanua, ma o loo tosi ai tuaoi, aemaise le tapue o ata ma tuu i luga o le upega tafailagi e faamaasiasi ai afioaga.

O ni tuuaiga na teena e le afioaga o Leauvaa, lea na faaalia manino e le taitai, Tevaga Leiloa e tatau ona tuuina atu ni faamaumauga o ia tuuaiga ua tuuai ai.

Na saunoa Tevaga o ia o loo taulamua i le fautuaina o tupulaga talavou o le nuu ina ia faatupu le filemu.,

Na toe faamanatu e Maulolo le faaiuga o le faamaisnoga 1963, ma o vaega o le faaiuga o lena faamasinoga na faatoa faataunuu i le tausaga ua mavae e pei o le fuataga o tuaoi o fanua o loo vevesi ai.

O le finau a Leauvaa o loo lilifa i le faamasinoga o le tausaga 2013, peitai ua mae’a lea mataupu ina ua toe ave le talosaga toe iloilo ma faatumau pea le faaiuga o le 1963, ma faatulai ese ai nisi o aiga o loo nofoia fanua o Afega.

Faaalia e le sui o Leauvaa ia Sala Fili o eleele o loo i tua o le 723-eka o fanua na to atu e le afioaga o Afega e galulue ai, o le talitonuga o Sala Fili e na o le faamalumalu lava o Fata ma Maulolo ae le toe aiāina e i laua ia fanua.

Saunoa foi Sala Fili e leai se malosiaga poo se aiā a le faamasinoga o fanua ma suafa e iloilo ai fanua ua mae’a tuuina atu e le faamasinoga poo le Court Grant mo latou e nonofo ma galulue ai.

Peitai na saunoa se tasi o molimau a le itu tagi o Ututaaloga Charlie Ulia ua mae’a taatia le faafanua ma ua mae’a foi ona fuaina eleele ma tuaoi, ma o loo manino lava o eleele o loo i le itu i Sasae o eleele e patino ia Afega ae o eleele o loo i le itu i Sisifo o eleele o Levi, Saleimoa ma na faailoa foi e Ututaaloga e tuaoi Afega ma Levi Saleimoa.

Saunoa Ututaaloga o fanua o loo nofoia e aiga o Leauvaa o loo aofia i le 723-eka i tua o le faatafafā ma e leai foi ni eleele umia saoloto o iai e pei ona finauina e Leauvaa.

Talu ai nei, na faasala ai e le faamsinoga nisi o aiga e toa 9, ona o le lē usitaia o le faatonuga a le faamasinoga i le nofoia o fanua tau Afega.

O le aso 8 o le masina fou o le a aumai ai le faaiuga a le faamasinoga o fanua ma suafa i lea mataupu.