O lea ua maea ona folasia finauga faaletulafono a loia i le mataupu ua faatoai atu iai le talosaga a le Peresetene o Faamasinoga o Fanua ma Suafa mo se poloaiga a le faamasinoga faasaga lea i le Loia Sili o le malo e avea ai ma sui o le Ao o le Malo i le lē tuuina atu o se tusi faamaonia poo se warrant e faamaonia ai le filifiliga ua maea ona faia e le Komisi o Galuega a le Faamasinoga o Fanua ma Suafa e pei ona maea faatautō ai le Sui Peresetene, o se Peresetene Lagolago ma se Faamasino fou o lea faamasinoga.
O loo talosaga foi le Peresetene mo se poloaiga a le faamasinoga e ta’u solitulafono ma solifaavae ai le finagalo o le Minisita o Faamasinoga e faapafala mo se taimi le faia o lea faatautoga faapea ma le faatinoina o galuega masani a le Faamasinoga o Fanua ma Suafa ae tālia le suesuega a le Komiti o le Palemene o loo sailiili ai ni faaletonu e pei ona māua i le tulafono o le faamasinoga o Fanua ma Suafa na pasia i le tausaga e 2020.
O finauga a le Loia a le Peresetene na ia faailoa ai o le gaioiga a le Minisita o se sui o le pulega faatonu poo le executive ua sosopo ai lona malosiaga faapulega faatonu o le galuega a le Faamasinoga o Fanua ma Suafa. Peitai na faamanatu e le faamaisnoga i le Loia o le fetusiaiga muamua a le Peresetene ma le Minisita na talia ai lea tuualalo ma malilie ai e taatia uma galuega a le faamasinoga i le masina o Fepuari ma Mati seia maua se taunuuga o suesuega a le Komiti Faapalemene.
O le tasi o itu na ioeina e le Loia a le Peresetene e le’i iai se taumafaiga e feiloai atu i le Minisita le alii Peresetene e teuteu ai faalotoifale lea mataupu ae ua tuu sa’o loa i le Faamasinoga Sili mo se faaiuga.
O le fa’aauau ma le taofia o se taimi o galuega a lea faamasinoga o se tasi lea o finauga na folasia e Loia o itu auai ona o loo finau mai le Loia Sili o loo iai le lape i le tulafono fou a le Faamasinoga o Fanua ma Suafa i le leai lea o se aiaiga faaletulafono e filifilia ma tofia ai faamasino ona o le faaleaogaina ma le soloia o malosiaga o le tulafono o le 1981 ma noatia ai loa ma le faaauauina o ia tofiga faamasino e aofia ai ma le tofi Peresetene.
Na talia e le Loia Sili se manatu o le faamasinoga pe faamata e mafai ona teuteu e le Palemene lea tulaga ma tuu iai se aiaiga e fa’aauau ai tofiga faamasino o loo iai nei pe teuteu i se aiaiga e toe faatutō uma ai alii ma tamaitai o lea faamasinoga a le atunuu . Na finauina foi e le Loia Sili o le tu’ualalo o le Minisita i le Peresetene e le’o sopoloa ai i le va tausi o le tafatolu o fefaatauagai o pulega o le malo ae o le finagalo o le tamaitai minisita i lona tulaga o ia o loo iai le vaaiga o le Matagaluega o le Faamasinoga.
O le isi fetusiaiga i le va o le Peresetene ma le Minisita i le faiauga o le masina o Fepuari na suia ai le finagalo o le Peresetene ma ia faailoa atu i le Minisita o le a faaauau gal uega a lea faamasinoga ae taatia le pitolaau a le Palemene nisi suiga e toe faia i le tulafono. Ua tālia nei la se faaiuga o nei finauga faaletulafono talosaga a le Peresetene o fanua ma suafa le afioga Fepuleai Atilla Ropati.
Ua taoto mai la galuega a le faamasinoga Sili le mataupu o le moliaga i le faalēmigao i le faamasinoga, le finauga i le lē faatautōina o sui faipule tamaitai faaopoopo e toalua ma le talosaga a le Peresetene o le faamaisnoga o Fanua ma Suafa ua reserve faaiuga a lea faamasinoga ma e le’o iloa se aso e fofogaina ai.
