Na faaali le tetee o le taitai o le Ituagai susuga Tuilaepa Lupesoliai Sailele Malielegaoi i le faaiuga a le faigamalo fou lea o le a tapena e sosofa ma nutipala le tulafono o lafoga totogi a faifeau tausi nuu lea na amata faamamalu i le tausaga e 2018.
O lea faaiuga ua faia e le Minisita ma lea Matagaluega e taofia lē tumau le toe faaauauina o malosiaga o lea tulafono e faamuta ai ma le toe totogiina o lafoga a faifeau tausi nuu. O le vaiaso ua mavae na faailoa lautele ai e le Matagaluega o Tiute ma Tupe Maua lea faaiuga ma masua mai ai i fafo se finagalo tetee o le taitai o le Ituagai ma tuuaia le Minisita ma le faigamalo fou i le faia o lea faaiuga ma avea o se faatosina o palota laiti e 7 o loo loma nei.
Na maua se feiloaiga ma le afioga i le Sui Palemia o le Minisita foi lea o Tiute ma Tupe Maua afioga Tuala Tevaga Iosefo Ponifasio e tusa ai ma le faia o lea faaiuga ae le’i faamutaina malosiaga o le tulafono e faasino i lafoga totogi a faifeau tausi nuu ma pasia e le Palemene i le 3 tausaga ua mavae i le taimi o pulea e le HRPP le Mālō.
Tali Tuala “O le mea moni lava e ui lava na iai le manatu pe a taofia ae o loo iai foi se lagona i le Tamaitai Palemia ma le Kapeneta e ao lava ona toe iloilo nisi o vaega ma ia toe foi i le atunuu aemaise lava le aiga faifeau o i latou e faasino tonu iai lenei lafoga ina ua toe faatalatalanoa ma toe tuu atu se avanoa ina ua aumai ai foi so latou taofi e tusa ai ma le tulaga ua fingalo iai le Mālō ina ua tapena lelei tulafono aua lona faamutaina.
E pei la o le uiga lena sei toe ave tasi lava i tua se tuu avanoa i nai faifeau atonu foi sa iai foi le lagona i so latou taofi sa tatau lava ona atoatoa uma ia feutagaiga aemaise foi ua faatalatalanoaga o lenei mataupu ae lei pasia le tulafono.”
Taua foi e Tuala “Sa iai foi lo latou lagona e mafai lava ona faitaulaga ia Ekalesia foi i le latou loto malie aua foi le atianeina o le Malo ae peitai sa teena foi e le Mālō sa iai talu ai nei lea foi itu manaia o le feutagaiga sa iai. Peitai la lea ua toe maua le isi avanoa o le sini autu lava o le faatalatalanoaga ina ua faagaioi meauma ae le’i suia le tulafono e aveese ai le lafoga a faifeau tausi nuu”.
Ina ua fesiligia le Sui Palemia i nisi o manatu a le ituagai e faapea ua faagaioi lea faiga ao loma faigapalota laiti e foliga mai ai o se faiga faatosina.
Na tali Tuala “Ina ua tulai mai le faigamalo sa faamuamua le mataupu lea i totonu o le matou matagaluega e le’i faamaimaua se taimi sa faapena ona matou agai loa e faatino le tulaga o le tapenapenaga aua le faamutaina o le lafoga lea mo faifeau e le’o iai se agaga faapena o mea tau palota poo ni fuafuaga ina ia faatosina ai le atunuu, Leai o loo manino folafolaga a le Faatuatua i le Atua Samoa ua Tasi o le mea lea o le a ave iai le faamuamua a le tamaitai Palemia ma le Kapeneta pe a tulai mai le Mālō lea ua faatino”.
