O le ogatotonu o lenei vaiaso ua tauaao atu ai e le Sui Palemia o Samoa le tofi ta’ita’ifono o le Fono a Malo o le Taupulega, i le ta’ita’i o le malo o Antigua ma Barbuda o lo’o usuia ai le fono a ta’ita’i o malo o le taupulega. Ua manatua ai e le ta’ita’i o lea malo ma le taligamalo a Samoa i lea fono fa’avaomalo, sa teuteu ma fa’amatagofie ai le afio’aga o Faleatiu i lanu o le fu’a a lea malo, lea sa tofu ai le nu’u ma le afio’aga ma le atunu’u latou teuina foi i teuga e fa’ailoa ai atunu’u e 56 o loo avea ma sui o malo o le taupulega i le taligamalo a Samoa i le masina o Oketopa o le tausaga e 2024.
O le momoli atu e le sui palemia le afioga Mulipola Anarosa Ale Molioo o le tofi ta’ita’ifono o le f’aailoga lea o le mae’a aloa’ia o le lua tausaga sa tau’ave ai e lo tatou atunu’u lea tofiga. O le usugafono a Samoa o loo ta’ita’ia e le Sui Palemia lea o lo’o aofia ai ma le Minisita o le Matagaluega o Aiga ma Agafesootai.
O lo’o fa’ailoa i fa’amatalaga fa’alauaitele i le fa’agasologa o le Fono a Malo o le Taupulega le auai o le Sui Palemia ma lana usugafono i se sauniga lotu sa talosia ai atunu’u uma o le taupulega, fa’apea foi ona lotolotoi le tama’ita’i Sui Palemia o le tatou malo i se taaloga kilikiti ma na o ia le tama’ita’i sa ‘ai filofilo i au e fulisia i ali’i i se ta’aloga sa avea ma polokalame o le mafutaga a tupulaga talavou o malo o le taupulega lea o loo auai se au malaga o talavou na filifilia e fai ma sui o Samoa.
Comments
Loading comments…