Auai le Ao o le Malo i le tatalaina o le Malumalu Sa o le Ekalesia a Iesu Keriso o le Au Paia o Aso e Gata Ai i Amerika Samoa

O lo’o i laufanua ma ‘ele’ele o le teritori o Amerika Samoa le faigamalaga a le afioga i le Ao o le Malo le afioga, Tuimalealiifano Vaaleto’a Sualauvi II ma lana Masiofo le afioga, Faamausili Leinafo Tuimalealiifano ona o se vala’au fa’aaloalo e auai i le fa’aulufaleina o le Malumalu Sa poo le temple a le Ekalesia a Iesu Keriso o le Au Paia o Aso e Gata Ai ua mae’a fausia i totonu o Amerika Samoa.

Ua fa’ailoa i luga o upega tafā’ilagi o feso’otaiga a le faigamalo a Tutuila ma Manu’a o le Aso Gafua o le vaiaso nei a’o le aso Sa lea i Amerika Samoa na taunu’u ai le afioga i le Ao Mamalu o le malo ma lana Masiofo ma sa fa’afeiloai lo la taunu’u i le malae va’alele i Tafuna e le afioga i le Lutena Kovana, le afioga Pulumataala Ae Ae Junior, ma ofisa sinia o le pulegamalo a Amerika Samoa, ae sa auai foi ma le Konesula o Samoa i le teritori le tōfā Fata Brian Kaio.

O le ogatotonu o le vaiaso nei ua amata faagasolo ai polokalame o le sauniga o le tatalaina o le Malumalu Sa ua fausia i Tafuna ma le fa’amoemoe o le Aso Sa 13 o Novema o le sauniga aloa’ia a le Ekalesia e tatala ai mo lona fa’aaogaina i polokalame fa’alelotu.

O Samoa Tutoatasi o loo iai le ulua’i malumalu Sa o lea Ekalesia i lenei itu o le pasefika, ae o le taimi muamua lenei ua iai lava se Malumalu Sa mo sauniga a le Ekalesia a Iesu Keriso o le Au Paia o Aso e Gata Ai mo ona tagata tapua’i i totonu o le teritori o Amerika Samoa.