Ua tuana’i atu le masina o Oketopa sa fa’atulaga e talimalo ai le malo o Samoa i le fono masani o le Atoa o Samoa e talanoaina ai atina’e o le manuia o le faigamalo a Tutuila ma Manu’a ma le malo tuto’atasi o Samoa.

O Tesema o le tausaga ua mavae na fa’ailoa ai e lo tatou malo le faia i Apia o lea fono a taita’i o Samoa i Sasa’e ma Sisifo ina ua mae’a ni feiloaiga a le Kovana Sili o Amerika Samoa ma le Palemia o Samoa sa faia i le teritori.

Peita’i ua fa’ailoa i se lipoti a le vaega fa’asalalau o le Talanei i Tutuila o se finagalo o le ta’ita’i o le faigamalo a Tutuila ma Manu’a i le masina o Aukuso na ia fa’ailoa ai sana tu’ualalo na tu’uina atu i le palemia o le malo tuto’atasi le susuga, Laaulialemalietoa Leuatea Polataivao Fosi Schmidt, sa ia fautuaina ai le fa’atelegese o tapenaga o le fono o le Atoa o Samoa ona e le’o mautinoa po’o le a tonu le ‘auga o lea fa’atasiga fa’avaomalo.

O le finagalo o le Kovana Sili o loo lipotia e le Talanei e toatele tagata ua latou fa’aali ni lagona ma latou fa’ailoa o se fono e faamaumau taimi.

Kovana Sili o Amerika Samoa, Pulaali’i Nikolao Pula. Photo: Talanei.com

O atugaluga o le Kovana Sili i lea lipoti o faiga meaalofa i le va nonofo ai o Samoa pe a mae’a se fono o le Atoa o Samoa e tele tupe e fa’aalu ai. E lei fa’ailoaina e le malo o Samoa se mafua’aga ua le taunu’u ai lea fono fa’avaomalo i le tuana’i ai o Oketopa sa fuafua e talimalo ai lo tatou malo ma le atunu’u i lea fono e talanoa ai mataupu ‘ese’ese tau i le atina’e manuia o Samoa e lua, aemaise lava i le itu i le tamao’aiga ma atina’e tetele e pei o fa’atoaga, tagata tafafao, ma mataupu i femalaga’iga.

O le fono ia Oketopa sa fa’atulaga o le ulua’i fa’atasiga lea o le Atoa o Samoa talu ona filifilia le faigamalo fou a Samoa tuto’atasi ma Amerika Samoa i le tuana’i o faiga palota i le tausaga ua mavae.