O se tina ua 57 tausaga o le soifua ua nofosala i le toese i Tanumalala mo le 10 masina, e ui sa finau lana loia mo se isi faasalaga e lē o le falepuipui.

O Leuluaialii Selesitine Vaaulu sa ia ioeina le moliaga o le faaoomanu’a tuga, umia o se auupega matautia, faapā o se laau malosi, ma le umia o se fana e lei lesitalaina faaletulafono.

O Oketopa o le tausaga e 2019 e tusa ai o faamaumauga a leoleo i le solitulafono e faapea, a o agai atu lē ua nofosala i lo latou fale ma ona alo, sa ia vaaia ai ni taulelea o le latou nuu faatasi ai ma lē na lavea i le pulufana, ua latou avatu ni maa ma laina i luma o le fale o Leuluaialii ua pupuni ai le auala.

Na tupu ai se feteenaiga ma oo ai i le afiafi o le aso lea, ae toe sāvali ane taulelea ma pasia luma o le fale o lē ua molia ma alu ane ai lona toalua ma sasa i le paipa se tasi o taulealea.

Na feosofi atu isi taulelea ma taumafai e faaoolima i le tamaloa ma alu ai loa lē ua molia ma avane le fana pulutasi o le ituaiga o le 22 ma faapāpā e tutuli ese ai taulelea ma luma o lo latou fale.

Faaalia e leoleo o le faapāpāina lea o laau malosi na aafia ai i se pulufana le malu o le nofoaga o se tasi o taulealea lea na ave i le falemai ma togafiti ai lona manu’a.

I le faaiuga a le afioga i le faamasino o le faamasinoga sili susuga Leiataualesa Darrel Clarke, na ia faaalia ai o le umia o se laau malosi ma le faapaina o se aupega o se gaioiga e ogaoga tele i le vaai a le tulafono.

O le mafuaaga lea o lona teena o le talosaga a le loia a lē ua faasalaina ia aua ne’i faia se faasalaga faafalepuipui.

Faaalia e le faamasino ua pasia e le Palemene tulafono e puipuiamalu ai le saogalemu o le soifua o tagata mai le aafia i aupega e pei o laau malosi ma e ao ai ona faia le faasalaga talafeagai ma le solitulafono.