Ua i aao nei o leoleo mo ni su’esu’ega se matāupu tau i solitulafono o fuālaau faasāina e faasino i le ‘aisa o loo tuua’ia ai ni alii e galulue o ni seila mo vaa a le faalapotopotoga o vaa a Samoa.
O loo faagaioia e lea faalapotopotoga a le malo malaga a vaa o le sami o loo feoa’i i le va o Samoa ma Amerika Samoa faapea vaa i le va o motu o Upolu ma Savaii.
Ua lipotia ai e le nusipepa o le Samoa Observer o le to’afitu o alii seila o loo tuua’ia ua faamālōlō ae tālia su’esu’ega a leoleo.
O se su’esu’ega faalotoifale a le faalapotopotoga o vaa a Samoa na aliali ai i fafo ia gaioiga solitulafono e pei ona tuua’ia o le pauta faasāina o le ‘aisa o loo masalomia sa tulei ma faatau e alii vaa ua masalomia.
E pei ona silafia o nai masina e le’i mamao atu sa faailoa ai e leoleo le maua o ‘aisa o nanā mai i ni pusamoa sa aumai o ni faamomoli i le vaa la’upasese o le Lady Samoa IV o loo faia malaga i le va o Apia ma Pago Pago ma ua iai tagata ua molia ai.
O le leoina o tuaoi o Samoa i o tatou uafu ma malae vaalele faavaomalo o se galuega o loo matuā tūtuaai ai leoleo ma le ofisa o le tiute e māta’itu e pei ona faaaogā ai masini fā’ata e su’eina uta ma tagata malaga faapea foi ona faaaogā ai ma taifau sosogi.
O le galuega foi a leoleo e lē o solomuli i le osofa’i ma su’e nofoaga e pei o fale o loo masalomia o loo faatino ai solitulafono e fesoota’i i le faaaogāina o nakoti poo fuālaau faasāina.
