O ni faamaumauga ua taulimaina e ala i se fesootaiga faaonaponei o lea ua faailoa ai se lisi o suafa o tagata faigaluega faavaitaimi mai Samoa i totonu o Ausetalia ua fautuaina e lē tatau ona toe faafou a latou konekarate ma ia faamuta le toe ave ai o ni avanoa faigaluega pe a toe foi atu i Samoa.
E 138 le aofaiga o tagata faigaluega faavaitaimi e aofia ai ni alii ma ni tamaitai na latou soli aiaiga o galuega, o nisi ua faatupu vevesi i le tagofia ai o le ava malosi ma le laau faasaina o le mariuana.
O nisi foi o le to’a 138 lea na sosola i tua ma nofoaga na faamautu ai mo nei galuega a’o nisi ua tia’i galuega ua lē usu e pei ona mafua ai ona tu’ua aiga ma fanau ae malaga mo ia galuega faavaitaimi. O loo faailoa foi i lea lisi faamatalaga o mafuaaga e lē tatau ai ona toe tuu ni avanoa i nisi o tamaitai na faamanuiaina i nei avanoa ona ua faasesē e se isi tamaitai faamaumauga o ana suega faafomai ma nātia ai lona ma’itaga a’o le’i tuua le atunuu.
O nisi tamaitai e toalua na ma’itaga a’o iai i Ausetalia mo ia galuega ma nisi alii ua maua a latou faanunumi a’o faamuli atu i Samoa o latou ta’itoalua ma fanau ma o se tasi lea o faaletonu e le’o ‘asa lava ni aumalaga mo nei galuega ma aafiaga faapenei.
E iai nisi o le lisi umi o tagata ua fautuaina e lē tatau ona toe malaga mo nei galuega i Ausetalia ona o solitulafono e pei o le faao’olima i nisi, faaleaga meatotino o nofoaga sa nonofo ai ma le faatupu vevesi. E pei ona silafia o loo silasila nei le Matagaluega o Pisinisi Alamanuia ma Leipa e ala i se fuafuaga a le malo e toe iloilo aiaiga e saili ai nisi mo nei avanoa faigaluega ona o le tele o faafitauli ua aliali mai i nisi o tagata faigaluega faavaitaimi.
