O suiga tetele o le tau, o faalavelave faalenatura, o lāmala ma faama’i lē pipisi ua saoasaoa le aafia ai o le ola ma le soifua o tagata, o nisi ia o mataupu autu na folasia e le taitai o le Malo o Samoa le afioga i le tamaitai Palemia, Afioga Fiame Naomi Mataafa, ina ua saunoa i le fono lona 78 a taitai o Malo Aufaatasi i le Aso Sa ae o le Aso Toonai lea i le aai o Niu Ioka i Amerika o loo tauaofia ai lea fono tāua a taitai o atunuu o loo avea ma sui o lea faatasiga o atunuu ma Malo o le lalolagi.
O le autu o le saunoaga a le taitai o le Malo o Samoa, ia tutū faatasi atunuu e faatino galuega talafeagai e tali atu ai i suiga o le tau, ua iloga ona aafia ai nisi o atunuu i lenei tausaga e pei o mu tetele i atunuu o Kanata, Greece, ma Maui i Hawaii.
O faama’i lē pipisi i Samoa lava ia na faailoa e le Palemia i lana saunoaga, o le ‘afa o tagata e maliliu, o gasegase e mafua i suiga o le soifuaga, ma ua tatau ai ona galulue taitai o Malo Aufaatasi e unaia le tausasami o tagata i meaai sa ola ma soifua a’e ai ae faaitiitia le faalagolago i meaai ua toe fai iai nisi gaioiga poo processed food.
A o auai le Palemia o Samoa i le fono faaletausaga masani a Malo Aufaatasi sa ia faailoa ai ma tapenaga a Samoa i le fono a taitai o Malo o le Taupulega o le a usuia ia Oketopa o le tausaga fou i lo tatou atunuu.
