Fai mai e to’aiva le aofa’i o tagata ua fasiotia i totonu o Gaza i osofa’iga a Isaraelu i le mae’a ona o latou tuua’ia le Hamas i le solia o aiaiga o le maliega sa faia ma Amerika aemaise o le faatinoina o le tuuina ane o tino maliliu o tagata na ave faapagota i le taimi o fetauiga.
Ta’ua e le CNN i le asō, sa faia se faatonuga a le Palemia o Isaraelu, Benjamin Netanyahu i le militeli ina ia faia ni osofa’iga i le Gaza Strip ma ua mae’a logoina foi Amerika.
Ua faailoa i le lipoti se faamatalaga a se tasi mai le militeli a Isaraelu e faapea na osofa’ia e le Hamas vaega’au a Isaraelu i le itu i Sasa’e o le laina samasama, lea e va ai nofoaga ua nofoia e Isaraelu i Gaza ma le isi vaega o totoe o le teritori.
Faailoa e le minisita o le puipuiga a Isaraelu, Israel Katz o le a totogi e le Hamas se tau tele mo le osofa’iga lea i ana vaega’au.
O loo faatalitali le to’atele poo le ā o le a i’u iai lenei matāupu sa manatu le to’atele, ua faamae’a peita’i e foliga e ono toe tele atu nisi ona aafiaga.
Puna o Faamatalaga: https://edition.cnn.com/2025/10/28/middleeast/israel-military-strikes-gaza-latam-intl
