O le asia ai e le Faatonu Sili a le faalapotopotoga a Malo Aufaatasi le United Nations Educational, Scientific and Cultural Organization(U.N.E.S.C.O.) Nair-bedouelle Shamila i le nofoaga o le Toomaga mo ē Puapuagatia mo se tasi o vaega tāua o loo galulue faatasi ai nei faalapotopotoga e lua ina ia taofia sauaga e ala polokalame o loo faatinoina.

I se pepa o faamatalaga mai le Toomaga, o lenei asiasiga o le sainia lea o le konekarate mo le vaega lona lua o lenei polokalame e faaauau ai le lagolago a le U.N.E.S.C.O. e faatautaia lenei polokalame i afioaga e faasoa ai vaega e ao ina silafia ma malamalama ai le atunuu e tusa o lenei mataupu ogaoga o loo faapea ona faatupulaia pea i totonu o le lotoifale.

Saunoa le Peresitene a le Toomaga, Siliniu Lina Chang e tusa ai o le faigapaaga a nei faalapotopotoga auā le feau o loo taumolimoli e lenei polokalame.

“O lenei faigapaaga ma galuega o loo faatino e tauala atu i lenei polokalame o loo mafai ona faaalia ai puipuiga ma tiute e faailoa ai sauaga o loo alia’e mai ma o loo mafai ona faatino e ala lea i le tali atu i aga faaleaganuu ina ia mautinoa o loo oo i aai o loto ma finagalo o le atunuu la matou feau taulogologo.”

E pei ona silafia ai o le faafitauli lenei o loo taumafai pea le Toomaga aemaise nisi o paaga o loo ave le lagolago ina ia foia lenei mataupu o loo maitauina le aliae pea lava pea i totonu o le atunuu ma o loo iai molimau e ala i le auaunaga a le Toomaga e tali ai aemaise i tina ma tamaitai o loo aafia i nei sauaga ma oo atu i faitotoa o le Toomaga mo se fesoasoani.

O se avanoa tāua foi lea i le faalapotopotoga ma lana aufaigaluega e feiloai ai i le Faatonu Sili a le U.N.E.S.C.O. ma momoli ai faamanuiaga mo lona tofiga ua faatino ma agai ai faatalatalanoaga e tusa ai o le auaunaga a le faalapotopotoga o le Toomaga mai le taimi na faavaeina ai seia oo mai i le taimi nei i le tele o lona sao e ala lea i le aapa atu o le aao fesoasoani mo i latou ua maua i mafatiaga.

O le tausaga e 2020 na faavae mai ai le faigapaaga a le Toomaga ma le U.N.E.S.C.O. e tauala atu lea i polokalame faaleautalavou, o faafiafiaga o loo tuuina ai se feau tāua mo le taofia o sauaga ma nisi o ana polokalame.