A o faagasolo ai tapenaga a lo tatou malo i le faamanatuina o le atoaga o le 64 tausaga o le malo tuto’atasi o Samoa ia Iuni o lenei tausaga 2026, o se tasi o tapenaga tāua o loo feagai nei ma le komiti autū o le Tuto’atasi ma le tatou Sisigafu’a o le sa’ilia o se Sini Autū poo se Theme faapea ma se Faailoga Aloa’ia poo se Logo.
O lea ua faailoa ai i se faasalalauga faalaua’itele se tauvaga e sa’ilia ai se sini ma se faailoga aloa’ia ma le fuafuaga e tatau ona faaoo uma i le matāgaluega a le Palemia ma le Kapeneta i le Aso Faraile o le vaiaso nei.
E 3 afe tālā le taui e maua e le sini autū ma le faailoga aloa’ia o le a filifilia.
O le sa’iliga foi o se sini autū ma se faailoga aloa’ia o le atoaga o le 60 tausaga o le tatou Tuto’atasi e 59 i latou na tuuina atu a latou autū ma faailoga aloa’ia ae na manumālō ai le Bluewave Samoa i le faailogatupe e lima afe tālā.
