Ua faatulaga le masina fou o Fepuari e toe amata ai ona tatala potu faamasino mo le su’esu’eina o matāupu e lē gata o moliaga solitulafono, matāupu lautele ma tagi e faaulu i le Faamasinoga o Fanua ma Suafa.
O se tasi o matāupu o loo i luma o le faamasinoga o le tagi tau palota mai Falealili 1, lea o loo sa’ilia nisi o molimau e leoleo i tusi saisai e pei ona iai se poloa’iga mai le Faamasino Sili i le masina faai’u o le tausaga na te’a nei.
I se fesoota’iga i le Sui Komesina o Leoleo, Falepuipui ma le Toefuata’ina le susuga Leiataualesa Samuelu Afamasaga mo se tala lata mai i tusi saisai o loo sa’ili ai ia molimau e to’alua o se ulugalii i Tafatafa Falealili, na faailoa mai e le Sui Komesina e le’i maua.
O le pepa o minute mai le faamasinoga o faigāpalota i le matāupu a Falealili 1 o loo faailoa ai e le Faamasino Sili, afioga Satiu Simativa Perese, e 6 masina ua sa’ilia ai molimau ma a lē maua e toe faaopoopo le isi ono masina.
Ua iai foi ma le taofiga faaletulafono poo le prohibition order ua tapu ma faasā ai nei molimau ona malaga ese ma Samoa
