O lea ua avea ma pine faamau o le aso faamanatu o le malo ma le atunuu o Ausetalia i Samoa i lenei tausaga 2026, le faaaloalo maualuga a lea malo i le amana’ia o le tautua ma le auaunaga a se tasi o tamalii o le tatou atunuu ua leva tausaga o aumau ma faamautū ai i le setete o Kuiniselani o loo to’atele o tatou tagata o loo faamautū ai.
O le fiafia ma le tali faaaloalo a le ofisa o lea malo i Samoa i le Aso Faraile ua mavae, na tauaao ai i le afioga Lemalu Roy Slade le pine taualoa o le Order of Australia ua amana’ia ai lana auaunaga i o tatou tagata o alala i lea setete o Ausetalia i le tele o tausaga e ala lea i ana tautua ma tomai eseese.
O le tauaaoina o le pine taualoa sa molimauina e le afioga i le Ao o le tatou Malo, le afioga Tuimalealiifano Vaaletoa Sualauvi II, o ta’ita’i o le malo o Samoa, sui o malo i fafo ma le to’atele sa valaaulia i le fiafia a le ofisa o le malo o Ausetalia na faailoga ai le aso o Ausetalia poo le Australian Day o lenei tausaga, sa faia i le faletalimalo o le Taumeasina Island Resort.
O se faatasiga foi sa saunoa ai le afioga i le sui Palemia o le tatou malo, le afioga Toelupe Maoiautele Poumulinuku Onesemo ma faafetaia le malo o Ausetalia i le tele o lona agalelei i fesoasoani mo le atina’e manuia o Samoa ma ona tagata.
Ae i le saunoaga a le sui o lea malo le Komesina Maualuga, o Will Robinson na ia faailoa ai le fesoasoani tupe e lua miliona tālā o le a tuuina atu e fesoasoani ai i galuega o le atina’e o nuu ma afio’aga o itumalo i lo tatou atunuu.
