O se team poo se vaega o foma’i faapitoa mai Sini ua malaga atu i Papua Niu Kini e faamautū le tulaga o iai le masaga tama e pei ona faailoa muamua atu i talafou i nai vaiaso ua mavae, pe mana’omia le faatino iai o se ta’otoga.
Fai mai le ABC o le masaga tama o Tom ma Sawong na ola i le 6 vaiaso talu ai i Papua Niu Kini ae pipii o la tino se’i tulou, e lē o mafai ona tuueseeseina.
O le vaiaso nei na asia ai e le ABC le masaga i le falema’i i Port Moresby ina ua maua le faatagana.
Sa ta’ua muamua i lipoti ina ua faato’ā fananau mai o le a ave i Sini mo togafitiga peita’i ua faailoa e fai si faigatā o lea tulaga lea la ua faimalaga ane ai le vaega lea o foma’i e faimalaga iai i Port Moresby.
Fai mai le Matāgaluega o le va i fafo a Ausetalia e le o iai se faigatā i le faatupeina o lea taumafaiga ma o loo fesoasoani foi le pulega o le falema’i lea i Port Moresby o loo iai le masaga.
O loo tālitāli le to’atele aemaise i aiga o lenei masaga tama i se tala fiafia pe a mae’a su’esu’ega a foma’i o loo faagasolo i le taimi nei.
Puna o Faamatalaga: https://www.abc.net.au/news/2025-11-22/australian-doctors-visit-rare-png-conjoined-twins/106040616
