A itiiti mai pe $2.5 miliona le fesoasoani a Ausetalia ua tuuina mo Papua Niu Kini e fesoasoani ai i le faalavelave ua aafia ai le tele o soifua i lea atunuu i le vaiaso nei.

O lipoti aupito lata mai mai Papua ua ta’ua ai pe ono oo atu i le 2 afe tagata ua tanumia i sologa eleele i le atunuu i le faaitu o Enga i le itu i Matu o Papua.

O loo faaauau pea galuega laveai ma le sailia o i latou e lei maua lava talu mai sologa eleele ia i le faaiuga o le vaiaso.

I le faato’ā mae’a ai o le faalavelave na faailoa ai e Malo Aufaatasi pe ā ma le to’a 100 tagata maliliu peitai ua toe faailoa mai i lipoti lata mai nei ua oo atu i le 670 a o faia ai pea galuega laveai.

Saunoa le sui Palemia o Ausetalia, Richard Marles o loo mafaufau uma Ausetalia i nai tagata Papua i lenei taimi faigata o le soifuaga, auā o Papua o se tuaoi o Ausetalia ma se uo ma o le a faatino e Ausetalia mea uma e mafai ona ofoina e fesoasoani ai.

O loo galulue faatasi le vaega o le puipuiga a Ausetalia ma le vaega o le puipuiga a Papua Niu Kini e fesoasoani i lenei faalavelave ma o le ata lea o le galuega faapaaga a Ausetalia ma Papua faapea ma a la vaegaau.

Puna o Faamatalaga: https://www.9news.com.au/world/papua-new-guinea-government-says-more-than-2000-people-were-killed-in-fridays-landslide/dab40639-622d-40a6-a198-abf993711541