O le faalavelave lenei na tula’i mai i le te’a o le vaeluaga o le po o le aso 14 o Ianuari 2026, na alu ane ai se valaau ma aga’i atu ai leoleo i se fale i le tuātusi i Waitārere Beach Rd, ma maua se tamā, ua maliu, ma lona to’alua le fafine ma lana fanau tama e to’alua sa manunu’a tigāina i ni manu’aga mai se laaumalosi, e tusa ai ma ulua’i lipoti a leoleo mai lea faalavelave.
O le ulua’i lipoti lea a leoleo e faapea, o i latou uma e to’afā na afaina i manu’aga mai se fana.
Peitai ina ua uma se ta’otoga na faia i le aso 16 o Ianuari e le foma’i e faia su’esu’ega o tino maliu, na faamautū ai, o le tamā e 60 tausaga o le matua ua maliu, o Ben Timmins na maliu mai manu’aga sa tatui i lona fatafata.
Ma o lea ua faamautū ai nei le lipoti e pei ona faamautinoa e Inspector Graig Sheridan i le Herald, ina ua mae’a le ta’otoga faapitoa o le tino maliu, faapea foi lipoti mai su’esu’ega o le nofoaga na tupu ai le faalavelave.
O loo taofia ai pea i le falema’i le tinā ma lana fanau tama e to’alua i o latou manu’aga mai le laaumalosi ma ua lē o toe iai i se tulaga lamatia o latou manu’aga, ae o loo faatalosaga mai ina ia taofia le aga’i atu o ni sa’ili’iliga faalaua’itele ia i latou i lenei taimi.
Saunoa Inspector Sheridan ina ua fesiligia pe ua faia ni moliaga i le to’atolu na sao mai, o le taimi nei o loo faagasolo pea su’esu’ega a leoleo i le si’omaga atoa o le nofoaga ma mea e sootaga atu i lenei faalavelave.
O le tinā o loo faaman’ualia e 46 tausaga o lona soifua, ma le fanau tama e 17 tausaga o le isi ae 21 le isi, o se fanau a le tinā mai se isi ona to’alua muamua.
O le tagata e to’alima iai i latou na maua atu i lea nofoaga, o le teineitiiti e 9 tausaga lona matua, o le afafine o Timmins, ma e iai le talitonuga, o ia lea na viliina le 111 ae le’i talanoa i le telefoni, ae na piki mai ai iinā e le vaega e tau atu iai valaau mo faalavelave faafuase’i.
Puna o Faamatalaga: https://www.nzherald.co.nz/nz/man-killed-in-waitarere-beach-incident-ben-timmins-suffered-stab-wound-not-gunshot/HOGQ6FA2K5EQZPSGAL6BSB37T4/
