Ua naunau le pulega o falepuipui i le matagaluega o leoleo ma le ola toe fuataina, ia molimoli se fe’au faalauiloa i lo tatou atunuu e ala i ni polokalame i nuu ma afioaga, e faatāua ai le ofoina o le fesoasoani e toe tapu’e olaga o i latou sa nofosala ma tuli faasalaga i le falepuipui.
O le afioaga o Matautu i Lefaga na faatino ai se tasi o polokalame a o lumanai le Eseta, i le manulauti o le galulue o tagata i totonu o aiga ma nuu, e faafeiloai ma toe avatu o latou tagata sa nofosala, e ola ma soifua faatasi i se siosiomaga fiafia ma saogalemu e aunoa ma le tusitusi lima ma faifai upu iai ona e faapea o se tagata sa pagota.
Ua faaalia e le sui Komesina o loo pulea ma vaaia le falepuipui i Tanumalala i se pepa faalauiloa, le susuga Leiataua Samuelu Afamasaga, a lelei ona aoaoina o tatou tagata i le tāua o le latou lagolago ma faasoa i le toe tapu’eina o olaga o i latou sa nofosala i le to’ese, e le taumate o se sao tāua lea i le taofia o le toe aafia o i latou sa tuli faasalaga i le falepuipui mai le toe faia o se solitulafono.
O se fesoasoani foi lea e toe atiina a’e ai o latou olaga ma taunuu lelei i se lumanai manuia.
O le polokalame lenei o se taumafaiga a le matagaluega o leoleo, falepuipui ma le ola toe fuataina e toe totō i loto o aiga ma nuu le lagona o le faatāua ma amanaia le tagata soifua o galuega mamana a le Silisiliese na ia fausia i lona faatusa.
