O le tāua o le mata’alia o le aufaigaluega a le ofisa o le tiute i le siakiina o uta e faaulufale i Samoa, e lē gata o malae vaalele ae o luga o uafu o loo afea e vaala’uoloa mai isi atunuu, ae faapea foi vaa o loo tautuaina malaga i le va o Samoa e lua.
O le Aso Toona’i na te’a nei na maua ai e le vaega o le tiute se faamomoli o se pusamoa sa aumai i Amerika Samoa o loo aumai faananā ai ma le pauta faasāina o le ‘aisa le methamphetamine o lona mamafa e tusa ma le tasi tesimale fā kilokalama.
Ua taofia ai se taule’ale’a mo su’esu’ega a leoleo, ma o lea taule’ale’a sa ia faaulufale i le atunuu lea faamomoli.
Ua faafetaia ai e le ofisa o le tiute lana aufaigaluega o loo ta’imua i le leoina o tuaoi o Samoa ona o le maua o ia nakoti poo pauta faasāina.
O loo ave le faamuamua a lea auaunaga a le malo i le faaaogāina o ta’ifau sosogi, ma le galulue faatasi ma isi tautua a le malo mo le leoleoina o tuaoi o le atunuu.
