Poo le toe 17 minute e ta ai le itula e 8 i le po o le Aso Toona’i na maua ai e leoleo se tino maliu, o loo iai le talitonuga o le tama’ita’i o Te Anihana Pomana, e 25 tausaga le matua ua leva ona tau sa’ilia mai.
E faamauina na maua lona tino i se togāvao o loo i Pukekohe.
Mo le silafia, o Te Anihana na leiloa mai i le aso 21 o Aokuso, ma e tusa ai ma faamaumauga i mea pu’eata poo CCTV footage, na alu ese Te Anihana mai le SkyCity i le nofoaga na api ai mo se taimi.
Faamauina na alu ese mai Te Anihana poo le 6 minute e te’a ai le 5 i le vaveao o lea aso ae tuu uma ana meatotino i le faletalimalo na nofo ai.
O le taimi mulimuli na māua ai lea mafine i CCTV poo le 16 minute e te’a ai le 5 i le vaveao i le Victoria Street West, ma e le’i toe vaaia ai loa lea talavou.
Māua i lipoti mai le Radio NZ a o le’i alu ese Te Anihana mai lea nofoaga, na ia tala i tua se tinoitupe ma e le’i toe maua nisi faamaumauga i le toe tala ai o se tupe i tua mai masini tala tupe.
Faamatala le faigatā ona tau sa’ilia o Te Anihana, e ui i le tele o faamaumauga na tuuina atu i leoleo ma tagata ua agai e ta’u atu nisi o faamatalaga e tusa ai ma le leiloa mai o le tama’ita’i.
Na oo lava i le su’esu’eina o vaega uma sa aga’i iai le talavou, e pei ona māua lona aga’i i luga o se pasi la’upasese WX1 bus i lea aso, ae lumana’i ai le aso na alu ese ai Te Anihana.
O faamaumauga i aso na i luma atu a o le’i leiloa lea talavou, e faapea na faimalaga mai lea tama’ita’i mai Dunedin aga’i i Christchurch i le amataga o le masina o Aokuso, na taunuu mai o ia i Aukilani i le aso 2 o Aokuso, ma na māua le togafitia ai i le falema’i i Middlemore.
Maitauina le eseese o nofoaga na api solo ai lea talavou a o le’i api i le SkyCity mai le aso 18 o Aokuso.
Faamauina le tele o taimi o tuuina mai ai talosaga a leoleo faatasi ai ma aiga o le Te Anihana mo faamatalaga e tusa ai ma faaitu o loo iai lea talavou, ae pagā lea ua i’u i tala faanoanoa taumafaiga.
O loo faasolo su’esu’ega i māfua’aga o le maliu ai o lea tama’ita’i, ma o loo tālia le ono faatino ai o se ta’otoga faapitoa i le tino maliu poo le post mortem.
Puna o Faamatalaga: https://www.rnz.co.nz/news/national/579854/body-of-te-anihana-pomana-found-after-she-went-missing-leaving-sky-city-hotel?
