Ole lona fa o aso ole faamanatuina ole Vaiaso o Tupulaga Talavou ile atunuu na asia ai e tupulaga talavou sa auai ilenei polokalame nisi o atinae oloo galulue ai nisi o Matagaluega ale Malo.
O se tasi o vaega na asia ole aoaoga i le vaega ole gataifale oloo ola ai le amu i Fagalii ma na faatinoina lea e le aufaigaluega mai le Matagaluega o Faigafaiva.
Faalia i faamatalaga a sui mai le Matagaluega i ai latou na auai ole amu e tele lona sao taua ile ola o le gataifale ae le gata i lea ole faamatalaina o amu eseese.
Na maua le avanoa e faatino ai e tupulaga talavou le toe totoina ole amu e faaogaina ai mea faigaluega oloo faaoga ele Matagaluega o Faigafaiva ma le Matagaluega o Tina ma Tamaitai.
Ole auga lava male faamoemoe o nei vaega ina ia mafai lea ona silafia e alo ma fanau o auaunaga oloo faatino e tauala mai i Matagaluega ale Malo le sootaga o nei vaega ma le ola ole gataifale lea oloo mafai ona maua ai le fofoga taumafa ale atunuu.
O leisi gaioiga ole asia lea o faatoaga ma lafumanu lea oloo faafailele ma tapue ai le ola o nisi o fualaau aina ma faatoaga aemaise lafumanu.
O nisi o fanau aoga na auai na tuuina ai le avanoa e silasila ile galuega oloo faatino e nisi o fai faatoaga mai Saina poo i latou oloo galulue i lenei nofoaga.
Ole itu na mafuli ai lenei asiasiga ole silafia lea ole taua o atjnae faaauau e pei ona iai nisi o fuafuaga ale Malo e faapena foi le auga o le poloketi oloo feagai ai i Nuu.
Ua maea le faamoemoe i Upolu nei ole aso a taeao lea olea amatalia ai i le motu tele i Salafai aua foi le nofo silafia o tupulaga lalovaoa atinae ma auaunaga aua le manuia lautele mole lumanai.
