O le faamautū ai o le filifiliga o ta’ita’ifono o komiti a Fono Faavae mo le poloketi miliona a le malo, ua toe faatumau ai le tauaveina o lea tofiga e le tamalii sa seei i le nofoa o le tofi faipule o Faasaleleaga 2 i le Paea’iga 17 a le Palemene, le afioga Magele Sekati Fiaui.
O lē ua tauaveina nei le tofi i le mae’a o le palota tele ia Aokuso o le tausaga ua mavae le tofa Vaaelua Senetenari Samau e le’i talosaga i le avanoa o le ta’ita’ifono e pei ona faailoa e le Palemia i le fono ma tusitala.
O le faamasinoga o le tagi tau palota mai Faasaleleaga 2 na faamaonia ai faiga faaālatua i le faaaogāina o se vaegatupe e 68 afe tālā o le poloketi miliona e faasaga i lē na faauluina le tagi lea ua toe filifilia e avea ma ta’ita’ifono.
Sa fesiligia ai e se tusitala le Palemia i se silasila a le malo i le faai’uga a le faamasinoga o faigāpalota i lea moliaga.
Le ta’ita’i o le malo le afioga i le Palemia susuga Laaulialemalietoa Leuatea Polataiavao Fosi.
