O le agaga o le Eseta sa faamanatu e Samoa ma le lalolagi sa laualuga ai le loto faamagalo ua amata ai lenei vaiaso i galuega a le malo ma le atunuu, ina ua taunuu i le fiafia le matāupu sa va ai le fogavaa i le malo ma le itumalo palota o Faasaleleaga 2.
Na masii mai le mamalu o le itumalo ma feiloa’i ma le Palemia ma le Kapeneta i le taeao o le Aso Lua e pei ona molimauina i auala o fesoota’iga a le malo ma faapena ona feofoofota’i ma teuteu ni to’a ma ni vala sa māfua ai ona taofia le faamatuuina atu o le tasi tesimale 8 miliona a lea itumalo, ma tuai ai ona maua faamanuiaga tau tupe o le toe a’e o a’oga.
O le a faafofoga i se vaega o le saunoaga a le ta’ita’i o le malo, ma le finagalo o le itumalo i lea feiloa’iga.
O le mae’a o le feiloa’iga na sainia ai loa maliega o le polokalame o le atina’e manuia o itumalo poo le poloketi o le miliona ma faamautū ai le tuuina atu o le tasi tesimale valu miliona o le tufatufaga o lea polokalame mo Fono Faavae a itumalo faapalota uma e 51.
Ua faamautū ai foi ma le maua e tagata o lea itumalo o le ta’i 150 tālā ma tupe o le fesoasoani a le malo mo a’oga le One Government Grant.
Na taualuga le feiloa’iga i faaaloaloga a le itumalo na faasopolia ai le Palemia ma Minisita o le Kapeneta faapea le Fofoga Fetalai o le Palemene.
