Ua lapata’ia mai e sui o le vaaitau le telē o le avanoa e oo mai ai le afā o Vaianu i le atunuu i le aga atu i le faai’uga o le vaiaso.
Faamauina e le National Institute of Water and Atmospheric Research, NIWA, e tusa ai ma faamaumauga o loo maualuga le avanoa e oo mai ai i Niu Sila le afā i le Aso Sa.
Ta’ua i le tau lalata mai i le atunuu, o loo valo’ia le tetele o timuga mamafa o le a fetaia’i ma itu Mātū ma Sasa’e o North Island.
Faailoa o aafiaga o ia itu o le atunuu o le a faalagolago lava i le ala o le a aga’i mai ai le afā o Vaianu.
I ripoti a le RNZ, na faailoa ai e le vaaitau e ono mata’utia aafiaga e oo iai itu tetele o Niu Sila i matagi malolosi ma timuga mamafa.
Ma ua faamanino ai e le sui vaaitau, John Law, ona o ia tulaga mata’utia o loo māta’itūina ma le toto’a e le ofisa ia vaega tāua.
I le taimi nei e lē o mailoa sa’o le malosi ma le saoasaoa o loo aga’i mai ai le afā, ae peita’i o loo faamauina le tetele o aafiaga e feagai ma le atunuu.
I ripoti mai le leitio faavaomalo a Niu Sila, ua faamauina ai o lea ua i le Vaega 4 poo le Category 4 le afā ma o loo iai i le va o Fiti ma Vanuatu, ma o loo aga’i i itu Saute i Sasa’e.
Ae o loo faamauina le aga’i atu i Papua Niu Kini ma ua molimauina le aafia o le atunuu, e pei ona iai lōlōga tetele, ua aafia ai auala laupapa i le motu o Niugini Islands.
I Fiti ua vaaia le lolovaia o auala i Fiti ma ua faaleagaina uma nofoaga tu lalata i le sami i le Atu Solomona.
Lipotia i faamaumauga a vaega a le vaaitau a Ausetalia na o latou faamauina le oo atu o le afā i le Vaega 4 i le po o le Aso Lua, ae o se vaega e le’i manatu mamafa iai Fiti e tusa ai ma faamaumauga.
Ae i Niu Sila nei, o loo lapata’ia e le MetService le iai o le atunuu i le vaega lanu moli i fautuaga o timuga mamafa e amata atu i le asō, Aso Lulu i Tasman i itu Mātū i Sisifo o Motueka ma Bay of Plenty i itu i Sisifo lea o Whakatāne.
Puna o Faamatalaga: https://www.rnz.co.nz/news/national/591735/a-very-close-eye-being-kept-on-cyclone-vaianu-s-possible-threat-to-north-island
