O le aoauli o le Aso Sa muamua o lenei masina fou o Fepuari na maua ai le tino maliu o se alii talavou 18 tausaga le matua, i sa’iliga sa faia mai le Aso Toonai na te’a nei e māfua ina ua tafea lē ua maliu i le faafuase’i ona pa le vaitafe i Sauniatu i le vaega o loo iai le afu e to’atele e aga’i iai mo ta’elega.
Faaalia e se matai o le aiga o lē ua maliu sa ia faailoa mai le faalavelave, e pa faafuase’i le vaitafe a o faia le ta’elega ma tafea ai lē ua fano le soifua.
Sa faia sa’iliga i le Aso Toonai i le aoauli e le’i maua le tino ae o sa’iliga i le aoauli o le Aso Sa na maua ai e nisi o taulelea o le nuu o Manunu le tino o lē ua maliu, ma o loo taoto i le falemaliu o le maota gasegase i Motootua mo su’esu’ega a foma’i.
O lē ua maliu e alala i Pesega e pei ona failoa mai e le matai o le latou aiga.
