O loo tau faavasega e le aiga o le tamaitai o Berniece Maeataanoa Samuelu le uma faafuasei o le ola o lea tina a’o iai i Ausetalia i Tasmania mo galuega faavaitaimi.
I se faatalatalanoaga a se tasi o le aiga o le tinā ua maliu ma le Samoa Global na taua ai e Florence Suiaunoa e faateia uma le latou aig ai lea tala faanoanoa aemaise lava o matua o Bernice o loo i Samoa faapea lona toalua ma lana tama teine.
O le masina na tea nei o Novema na malaga ai Berniece i Ausetalia ae o Florence sa malaga i le masina o Setema na ia taua na logo atu i latou o le vaveao o le Aso 4 o Tesema na maua atu e nisi na o latou nonofo faatasi Berniece ua uma lona ola masalomia na maliu ao moe i le po.
Taua e Florence e faateia o ia ona sa talanoa ma lona aunty i luga o le telefoni i le po ae maliu i le aso na sosoo ai ma sa talatalanoa fiafia ai ia te ia e leai foi ni auga e faapea na ma’i.
Taua foi e lea tamaitai na te faafesootai lava lona aunty i aso uma pea maea galuega, o Berniece o le uso laititi o lona tina ma na ola faatasi mai i totonu o Lona Fagaloa i Upolu.
Faailoa e Florence na vili atu tamaitai e potu faatasi ma le uso o lona tina ma faailoa atu ia te ia le tala faanoanoa ma faamatala atu ia te ia o le vaveao o lea lava aso na tatagi ai le telefoni a Berniece o lona toalua mai Samoa o loo vili atu e fafagu e sauni mo galuega peitai e lei ala i luga berniece e tali le telefoni, o ī na iloa ai loa e ia tamaitai ua uma le ola o Berniece.
Taua foi e Florence o le galuega masani lea a Sam Samuelu le toalua o Berniece e vili i taeao uma e fafagu lona toalua e sauni i le galuega peitai o le taeao lea ua fiu si ona toalua e faafesootai ua le tali mai lea tinā.
O loo faagasolo suesuega i le uma ai o le ola o lea tina ma ua momoli atu ai foi faamaisega i le aiga faanoanoa o Berniece ona o le tala faanoanoa ua motusia faafuasei ai le mafutaga ma aiga.
