E toatasi le tagata ua maliu ma le isi toalima e talitonuina ua maliliu foi ina ua osofaia le vaegaau a le ami a Indonesia lea na agai atu e taumafai e laveai mai le pailate Niu Sila sa ave faamalosia e le West Papua Liberation Army.
O le pailate o Philip Mark Mehrtens e pei ona faailoa ia tatou talafou mai lava i le amataga o lenei mataupu e lei toe faasaolotoina ane lava ae o se lipoti i le amataga o lenei vaiaso ua ta’ua ai o se kulupu e toa 36 o fitafita sa iai i se nofoaga i Nduga e sailia le alii pailate, na tafana ane e sui o le Liberation Army i le Aso Toonai.
E faamaonia e toatasi ua maliu ae o loo iai isi lipoti o loo ta’ua ai e toaono atoa le au maliliu ma le isi silia ma le 20 o fitafita na sosola ese.
Ua ta’ua foi i isi lipoti e toaiva isi fitafita ua taofia nei e le vaega tetee lea.
Fai mai o loo faia pea sailiga ae ua atili faafaigata i le faaletonu o le tau ma le leai ma se fesootaiga.
Fai mai le sooupu mai le Indonesian Armed Forces o le osofaiga na tupu i se nofoaga ua latalata lava i le vaega o loo taofia ai le alii pailate.
O le masina o Fepuari o le tausaga nei na pueina ma ave faapagota ai le alii pailate Niu Sila ina ua tulaueleele le vaalele na malaga atu ai i le faaitu o Papua i Indonesia.
