I le aso 13 o Iuni na amata ai le galuega a le Komisi su’esu’e o faigapalota ile savalia o nuu ma itumalo faapalota e 51 o le atunuu, ile sailia o finagalo ile faamoemoe e toe faaleleia atili faiga filifiliga a le atunuu, ma fuafua ai foi pe talafeagai le faia o nisi teuteuga ile tulafono o faigapalota, o lea ua maea le galuega a le komisi ma ua amata ona faagasolo a latou faatalatalanoaga i finagalo o le atunuu ua latou faamauina aemaise o finagalo tusitusia ua faaoo atu aemaise o finagalo o le atunuu sa tuuina atu e ala i fesootaiga i luga o upega tafailagi.
Ua faailoa mai e se ofisa sinia o le ofisa o le komisi o faigapalota o soalaupulega ua feagai nei ma sui e toa sefulutasi o le komisi su’esu’e e aofia ai le taitaifono, o loo fuafua e tatau ona maea ile masina o Novema ona fausia ai lea o se latou lipoti mo le tuuina atu muamua ile kapeneta, ae taualuga ile folasia ile Palemene.
O mataupu sa autu iai le sailia o finagalo o le atunuu ao faagasolo le galuega a le komisi su’esu’e o Lola palota, sui tamaitai ile palemene, itumalo faaleaganuu, agavaa o sui tauva, resitala o vaega faaupufai, soligatulafono ma faamasinoga, palota a tagata Samoa o loo aumai i atunuu i fafo, sui o vaega faaupufai, faatulagaina o le ofisa o le komisi o faigapalota, ma nisi mataupu lautele e patino i faiga palota.
O le motu o Upolu na tele iai le taimi o le galuega a le komisi suesue, faatusa i Savaii e lua ma le afa vaiaso sa feiloai ai sui o le komisi ma afioaga o itumalo faapalota i Puleono i Salafai. O le afioga Luafatasaga Tu’u’u Ieti Taule’alo o le taitaifono o le komisi su’esu’e na tofia ma faamaonia e le kapeneta ina ua maea faailoa lautele e le taitai o le Malo le afioga ile Palemia ia Aperila o le tausaga na tea nei, le finagalo ole kapeneta ile filifilia o se komisi suesue o faiga palota e silasila ile tulaga sa faagasolo ai le palota tele o le tausaga e 2021.
